Ermənistan Milli Assambleyasının sədri İrəvanla Bakı arasında gedən danışıqlar prosesini şərh edib.
Tribunainfo.az Sputnik Armeniya-ya istinadən xəbər verir ki, ER parlamentinin sədri Alen Simonyan hesab edir ki, Ermənistan və Azərbaycan xarici işlər nazirləri arasında danışıqlar Türkiyə lideri Rəcəb Tayyib Ərdoğanın Bakıya səfəri ilə əlaqədar təxirə salınıb.
Bundan əvvəl bildirilmişdi ki, Ermənistan və Azərbaycan xarici işlər nazirləri arasında iyunun 12-də Vaşinqtonda keçirilməsi nəzərdə tutulan müzakirələrin növbəti raundu Bakının xahişi ilə təxirə salınıb.
Simonyanın fikrincə, Türkiyə prezidentinin Bakıya səfərindən sonra Azərbaycan tərəfinin ritorikası çətin ki, sərtləşsin. Ermənistan parlamentinin spikeri hesab edir ki, Azərbaycanın ritorikası erməni tərəfinin davranışı və mövqeyi ilə bağlıdır.
“Məsələn, “dəhliz” baxımından erməni tərəfi öz iradəsini göstərdi, təkbaşına qətiyyətlə təkid etdi və görünür, bunu eşidiblər”, – Simonyan parlamentdə jurnalistlərə bildirib.
Ermənistan Milli Assambleyasının sədrinin qeyd etdiyi kimi, tərəflər ən sadə məsələlərdə qarşılıqlı anlaşmaya gəlməyəcək və müəyyən məqamlarda ziddiyyətlərə yol verməməyə çalışırlar. Simonyan 9 noyabr 2020-ci il tarixli bəyanatı misal çəkərək bildirib ki, tərəflər onun məqamlarını müxtəlif cür şərh edir.
Tərəflər arasında yaranmış fikir ayrılıqlarının görüşün təxirə salınmasına səbəb ola biləcəyi ilə bağlı suala Simonyan mənfi cavab verib. O, həmçinin yaxın vaxtlarda danışıqların baş tutacağına ümid edir.
